اتحاد المتجولين التونسيين ينظم ولاول مرة تحدي الترا ترايل. الرياضة هاذي للي ما يعرفوهاش هي اختصاص من اختصاصات الجري لمسافات طويلة لكن في مسالك طبيعية صعيبة.
فكرة تنظيم التحدي هذا جات بعد ما شفنا برشا مالمغرومين يحاولو يقطعو مسافات طويلة و يحطو ارقام جديدة لكن يواجهو صعوبات تخليهم ما ينجحوش في تحدياتهم. لذلك قررنا انضمو حاجة بمعايير احترافية و نوفرو الدعم لمجموعة مختارة باش تقوم بتحدي المسلك الي يربط بين راس انجلة و راس الصرات من ولاية بنزرت و طولو 55 كيلومتر.
قررنا نعطيو الفرصة للي مغرومين بالجري و يحبو يجربو الالترا ترايل باش يختبرو رواحهم و يواجهو تضاريس المسار هذا في اطار حدث منظم بدقة.
الحدث هذا تاسيس لمسابقات الترايل والRaid الي ناوين عليهم فالمستقبل القريب. اختبار لينا كمنظمين نسعاو لمستوى افضل و فرصة للمشاركين باش يحققو انجاز يتطورو بيه في غرامهم و يسجلو ارقام جديدة و رسمية للمسلك.
الاتحاد باش يوفر الدعم اللوجيستي الكامل للمجموعة المشاركة باش ينجمو يعطيو ما عندهم و يكملو المهمة في احسن الضروف و اسرع وقت ممكن.
الحدث هذا مفتوح للمشاركة للناس لكل لكن بشروط منطقية و بسيطة وهي:

– تكون عمرك 18 فما فوق
– تكون عندك تجربة موثقة في سباقات المسافات الطويلة (نصف ماراطون فما فوق).
– تمدنا بنتيجتك خلال عملية التسجيل باش تثبت اهليتك.

اذا الشروط هاذي توفرت و تحب تخوض التحدي ما عليك الا تعمر الformulaire واحنا نتصلو بيك و نعطيوك كل التفاصيل اللازمة و قانون المغامرة الي لازم تقراه و تفهمو قبل.

– باش نوضحو اكثر، الفريق المشارك باش:

يحاولو يقطعو مسافة 55كم من راس انجلة لكاب صرات في اسرع وقت ممكن و ياسسو رقم جديد.

و باش نسهلولهم المهمة الاتحاد باش يوفر:

– التنقل لنقطة الانطلاق و العودة من نقطة الوصول.
– 3 نقاط استخراج في حالة الانسحاب.
– 3 نقاط تزود فالطريق توصللكم ماكلتكم و ماكم و دبشكم الي تستحقوه لكل.
– مسعف و kiné و خيمة في كل نقطة.
– توثيق للمغامرة بالصورة والفيديو.
– شهادة و T-Shirt لكل finisher.

اذا عندك الثقة واللياقة والقليب اللازمين باش تجرب روحك ضد اصعب المسارات والعوامل و تشارك في مبادرة اولى تاريخية ما عليك كان اتبعنا.

غدوة نص النهار باش نحطو lien التسجيل.
لمزيد من المعلومات تنجمو تتواصلو معانا عالصفحة.

URT.

Article similaire